ایران نے جوہری تنازع پر تجاویز قطر کے توسط سے امریکا کو بھجوا دی

ایران نے جاری جوہری تنازع اور جنگ کے خاتمے کے لیے قطر کی وساطت سے ایک تزویراتی خط امریکا کو بھجوا دیا ہے، تاہم ایرانی حکام نے واضح کیا ہے کہ ان تجاویز پر باضابطہ بات چیت صرف اس صورت میں ممکن ہو گی جب امریکا تہران کی تمام 7 بنیادی شرائط قبول کرے گا۔

ایرانی ذرائع کے مطابق واشنگٹن ان تجاویز کا تفصیلی جائزہ لے رہا ہے، تاہم امریکا کا مؤقف ہے کہ ابتدائی مذاکرات کے ایجنڈے میں جوہری امور کو لازمی شامل کیا جائے۔ ایران کے سپریم نیشنل سیکیورٹی کونسل کے سینئر عہدیدار محسن رضائی نے اپنے دورہٴ روس کے موقع پر گفتگو کرتے ہوئے واضح کیا کہ “ہم نے امریکیوں کے سامنے 7 سخت شرائط رکھی ہیں۔ جب تک وہ ان شرائط کو تسلیم کر کے عمل درآمد نہیں کرتے، نہ تو ہم آبنائے ہرمز کھولیں گے اور نہ ہی کوئی باضابطہ مذاکرات ہوں گے۔” ایرانی مطالبات میں ملک پر عائد تمام اقتصادی پابندیوں کا فوری خاتمہ، منجمد اثاثوں کی مکمل بحالی اور جنگی نقصانات کا معاوضہ و ہرجانہ کی ادائیگی شامل ہے۔

اس بریک تھرو کے لیے ریاستِ قطر نے تہران میں سفارتی گفتگو کے دو ادوار مکمل کرنے کے بعد تیسرا دور دوحہ میں منعقد کیا، جبکہ قطری سفارت کاروں نے حالیہ دنوں میں آرمینیا میں بھی ایرانی حکام کے ساتھ پسِ پردہ اہم اجلاس کیے ہیں۔