امریکی کمپنی کا رات کو سورج کی روشنی بیچنے کا منصوبہ

دنیا بھر میں بجلی کی بڑھتی ہوئی ضروریات کے پیشِ نظر توانائی کے متبادل ذرائع کی تلاش جاری ہے، تاہم امریکی ریاست کیلیفورنیا کی ایک خلائی ٹیکنالوجی کمپنی ‘ریفلیکٹ آربیٹل’ (Reflect Orbital) نے رات کے وقت زمین پر سورج کی روشنی پہنچانے کا انوکھا اور حیران کن منصوبہ پیش کر دیا ہے۔ اس منصوبے کے تحت خلا میں بڑے بڑے آئینے نصب کر کے سورج کی روشنی زمین کے مخصوص علاقوں تک منعکس کی جائے گی۔

کمپنی کا مقصد ایسے سیٹلائٹس خلا میں بھیجنا ہے جن پر 18 بائی 18 میٹر کے بڑے آئینے نصب ہوں گے، جو رات کے وقت شمسی توانائی کے منصوبوں، قدرتی آفات سے متاثرہ علاقوں اور ہنگامی امدادی کارروائیوں کے لیے سورج کی روشنی فراہم کریں گے۔ اس مقصد کے لیے کمپنی نے راکٹ ساز ادارے ‘سکائی روٹ ایرو اسپیس’ کے ساتھ دو راکٹ لانچ کرنے کا معاہدہ بھی طے کر لیا ہے۔ منصوبے کی پہلی آزمائش 2027ء کی دوسری سہ ماہی میں ‘ایئرینڈل ون’ (Earendel 1) سیٹلائٹ کے ذریعے کی جائے گی، جبکہ کمپنی کا طویل المدتی ہدف 2035ء تک خلا میں 50 ہزار سیٹلائٹس کا نیٹ ورک قائم کرنا ہے، جس کی سہولت صارفین کو موبائل ایپ کے ذریعے فراہم کی جائے گی۔

دوسری جانب، اس منصوبے نے ماہرین فلکیات اور ماحولیاتی کارکنوں میں شدید تشویش پیدا کر دی ہے۔ جولائی میں امریکی ریگولیٹری ادارے سے منظوری کے باوجود ماہرین نے فیڈرل کمیونیکیشن کمیشن (FCC) سے اس کی منسوخی کا مطالبہ کیا ہے۔ ‘دی ایسٹرو فزیکل جرنل لیٹرز’ میں شائع تحقیق کے مطابق کمپیوٹر ماڈلز ظاہر کرتے ہیں کہ خلا سے آنے والی روشنی فضا میں پھیل کر آس پاس کے علاقوں میں بھی غیر مطلوبہ روشنی کا باعث بنے گی، جس کے نتیجے میں رات کا قدرتی ماحول، انسانی صحت اور فلکیاتی مشاہدات بری طرح متاثر ہو سکتے ہیں۔