بلوچستان کے حالات دیکھ کر دل خون کے آنسو روتا ہے، جسٹس جمال مندوخیل

سپریم کورٹ کے معزز جج جسٹس جمال خان مندوخیل نے کہا ہے کہ بلوچستان اور یہاں کے وکلاء سے ان کا گہرا تعلق ہمیشہ قائم رہے گا، تاہم صوبے کی موجودہ بگڑتی صورتحال دیکھ کر ان کا دل خون کے آنسو روتا ہے۔

کوئٹہ میں بلوچستان بار کونسل کی جانب سے اپنے اعزاز میں دیے گئے پروقار الوداعی عشائیے سے خطاب کرتے ہوئے جسٹس جمال خان مندوخیل نے کہا کہ بطور جج بلا خوف و خطر انصاف کی فراہمی ان کی آئینی ذمہ داری اور فرض تھا، جسے انہوں نے پوری ایمانداری سے نبھانے کی کوشش کی ہے۔ انہوں نے بلوچستان کی امن و امان کی صورتحال پر تشویش کا اظہار کرتے ہوئے کہا کہ یہ لمحہ فکریہ ہے کہ بدقسمتی سے صوبے میں ایسے نازک حالات کیوں پیدا ہوئے۔

جسٹس جمال خان مندوخیل نے اس بات پر زور دیا کہ بلوچستان میں امن قائم ہوگا تو ہی کاروباری سرگرمیاں بحال ہوں گی اور عوام اپنے مسائل کے قانونی حل کے لیے عدالتوں کا رخ کریں گے۔ انہوں نے کہا کہ صوبے میں ماضی کا پرامن اور خوشگوار ماحول واپس لانے کے لیے تمام متعلقہ حلقوں اور اسٹیک ہولڈرز کو مل بیٹھ کر سنجیدگی سے حکمتِ عملی بنانی ہوگی۔ الوداعی تقریب میں سپریم کورٹ اور بلوچستان ہائیکورٹ کے ججز سمیت وکلاء اور قانون دانوں کی بڑی تعداد نے شرکت کی