ٹرمپ کی شکست پر رابطے بحال؛ ایرانی وزیر خارجہ کی سعودی ہم منصب سے ٹیلیفون پر گفتگو

ایران کے وزیرِ خارجہ عباس عراقچی نے سعودی عرب کے وزیرِ خارجہ شہزادہ فیصل بن فرحان سے ٹیلی فونک رابطہ کیا ہے، جس میں مشرقِ وسطیٰ کی مجموعی صورتحال اور خطے میں امن و استحکام کے قیام کے لیے جاری سفارتی کوششوں پر تفصیلی تبادلہ خیال کیا گیا۔

ایرانی سرکاری خبر رساں ادارے (ارنا) کے مطابق، دونوں وزرائے خارجہ نے علاقائی پیش رفت اور تنازعات کے حل کے لیے کی جانے والی سفارتی کوششوں کے مختلف پہلوؤں پر گفتگو کی، تاہم گفتگو کے حوالے سے مزید تفصیلات میڈیا کو جاری نہیں کی گئیں۔ اسی روز ایرانی وزیرِ خارجہ عباس عراقچی نے خطے کے دیگر ممالک کے ساتھ سفارتی رابطہ مہم کو تیز کرتے ہوئے قطر، عمان، ترکیہ، اردن اور کویت کے وزرائے خارجہ سے بھی الگ الگ ٹیلی فونک رابطے کیے۔ ایرانی ذرائع کے مطابق عباس عراقچی نے پاکستان کے نائب وزیراعظم و وزیرِ خارجہ اسحاق ڈار سے بھی رابطہ کر کے علاقائی سلامتی پر تبادلہ خیال کیا۔

عمان کے وزیرِ خارجہ بدر البوسعیدی سے بات چیت کے دوران بحری راستوں کی حفاظت یقینی بنانے، جنگ کے خاتمے اور خطے میں دوبارہ کشیدگی کو روکنے کے لیے عملی اقدامات کی ضرورت پر زور دیا گیا۔ واضح رہے کہ امریکہ اور ایران کے درمیان جنگ کے خاتمے اور آبنائے ہرمز میں عالمی بحری آمدورفت کی بحالی کے لیے قطر اور عمان سمیت کئی ممالک اہم ثالثی کا کردار ادا کر رہے ہیں۔ اگرچہ 2023ء میں سعودی عرب اور ایران کے درمیان سفارتی تعلقات بحال ہو چکے ہیں، تاہم یمن میں حوثیوں کے حملوں اور علاقائی سلامتی پر دونوں ممالک کے درمیان تحفظات موجود ہیں۔