حوثیوں کا جنگ بندی کیلیے سعودیہ سے 51 ارب ڈالر ہرجانہ اور حکومت تسلیم کرنے کا مطالبہ

یمن کے ایران نواز حوثی باغیوں نے سعودی عرب کے ساتھ سالہا سال سے جاری جنگ کے باضابطہ خاتمے کے لیے 51 ارب ڈالر کے بھاری مالی معاوضے اور یمن پر اپنی حکمرانی کو تسلیم کرنے کا انتہائی سخت مطالبہ کر دیا ہے۔

امریکی اخبار ‘وال اسٹریٹ جرنل’ کی رپورٹ کے مطابق سعودی عرب نے بحیرہ احمر میں تجارتی بحری جہازوں پر حوثیوں کے مسلسل حملوں اور آبنائے باب المندب کے قریب اہم تزویراتی علاقوں پر ان کے قبضے کے بعد جنگ بندی کے امکانات کا جائزہ لینے کے لیے رابطے قائم کیے تھے۔ مذاکرات سے آگاہ باخبر ذرائع نے انکشاف کیا ہے کہ حوثیوں نے 51 ارب ڈالر کی یہ رقم سعودی فضائی حملوں اور یمن کی طویل ناکہ بندی کے نتیجے میں ہونے والے نقصانات کے تلافی اور معاوضے کے طور پر مانگی ہے۔ حوثیوں کا دوسرا اہم مطالبہ یہ ہے کہ سعودی عرب عالمی سطح پر تسلیم شدہ یمنی حکومت کی حمایت فوری ختم کر کے حوثی حکومت کو تسلیم کرے۔

وال اسٹریٹ جرنل نے اپنی رپورٹ میں دعویٰ کیا ہے کہ سعودی ولی عہد شہزادہ محمد بن سلمان زمینی سطح پر مزید برتری حاصل کیے بغیر حوثیوں کے ساتھ کسی قسم کا جامع معاہدہ کرنے کے حق میں نہیں۔ تاہم، انہیں یمن میں مزید اتحادی افواج بھیجنے کے نتیجے میں بھاری جانی نقصان اور اندرونِ ملک شدید عوامی مخالفت کا خدشہ بھی لاحق ہے۔ واضح رہے کہ سعودی حکام نے تاحال حوثیوں کے ان مالی و سیاسی مطالبات پر کوئی باضابطہ اعلان نہیں کیا اور نہ ہی ان مذاکرات کے نتیجے میں کسی حتمی پیش رفت یا معاہدے کی تصدیق کی گئی ہے۔