شہباز شریف نے کشمیر چوک انڈرپاس منصوبے کا افتتاح کر دیا

وزیراعظم شہباز شریف نے وفاقی دارالحکومت اسلام آباد میں ‘کشمیر چوک انڈرپاس’ منصوبے کا باقاعدہ افتتاح کر دیا ہے۔ اس موقع پر وزیراعظم کو منصوبے کی تعمیراتی تفصیلات اور شاہراہوں پر ٹریفک کا دباؤ کم کرنے سے متعلق جامع بریفنگ دی گئی۔

تقریب سے خطاب کرتے ہوئے وزیراعظم شہباز شریف نے کہا کہ کشمیر چوک انڈرپاس منصوبہ ریکارڈ محض 27 دنوں کی مختصر ترین مدت میں مکمل کیا گیا ہے۔ انہوں نے منصوبے کی اتنی تیز رفتار اور معیاری تکمیل پر وفاقی وزیر داخلہ محسن نقوی اور متعلقہ ٹیم کو سراہتے ہوئے کہا کہ انہوں نے اپنے پورے سیاسی کیریئر میں اتنی برق رفتاری سے کسی منصوبے کو مکمل ہوتے نہیں دیکھا۔ وزیراعظم نے واضح کیا کہ یہ صرف 500 میٹر کا انڈرپاس نہیں بلکہ 4 کلومیٹر طویل سڑکوں کا نیٹ ورک ہے جو 1 ارب 45 کروڑ روپے کی لاگت سے مکمل ہوا ہے۔ یہ منصوبہ تخمینہ لاگت سے ڈھائی فیصد کم قیمت پر ‘ای پیڈز’ (E-PADS) کے شفاف نظام کے ذریعے ٹھیکے پر دیا گیا تھا۔

بریفنگ کے دوران بتایا گیا کہ اس منصوبے کے تحت 6 ہزار 340 نئے درخت لگائے گئے ہیں جبکہ کشمیر سے مناسبت رکھتے ہوئے دو دیدہ زیب مونومنٹس بھی تعمیر کیے گئے ہیں۔ وزیراعظم نے ہدایت کی کہ 2027ء میں ہونے والی شنگھائی تعاون تنظیم (SCO) کانفرنس کے لیے اسلام آباد کو مزید خوبصورت بنانے میں کوئی کسر نہ چھوڑی جائے۔ تقریب سے خطاب میں وفاقی وزیر داخلہ محسن نقوی نے بتایا کہ وفاقی کابینہ نے ون کانسٹی ٹیوشن ایونیو (One Constitution Avenue) کی جے آئی ٹی رپورٹ کی منظوری دے دی ہے، جس سے اربوں روپے مالیت کی جائیداد سی ڈی اے کو واپس مل گئی ہے۔