ٹرمپ کے مواخذے کیلئے ڈیموکریٹس کو مزید 13سینیٹرز کی حمایت درکار

امریکی وسط مدتی انتخابات میں سینیٹ کی 54 نشستیں حاصل کرنے کے باوجود ڈیموکریٹس کے لیے صدر ڈونلڈ ٹرمپ کا مواخذہ کرنا آئینی طور پر ایک بڑا چیلنج برقرار ہے۔ 100 رکنی امریکی سینیٹ میں صدر کی برطرفی یا مواخذے کی منظوری کے لیے دو تہائی یعنی 67 ووٹ درکار ہوتے ہیں، جس کا مطلب ہے کہ تمام ڈیموکریٹ ارکان کے ساتھ دینے کے باوجود انہیں مزید 13 ریپبلکن سینیٹرز کی حمایت حاصل کرنا ہوگی۔ محض سادہ اکثریت حاصل کرنا برطرفی کے لیے کافی نہیں ہوگا بلکہ اس کے لیے علیحدہ آئینی کارروائی کی ضرورت ہوگی۔ سیاسی مبصرین کے مطابق ڈیموکریٹس کی اس کامیابی سے وائٹ ہاؤس کے لیے سیاسی مشکلات اور حکومتی جواب دہی کا دباؤ تو بڑھے گا، تاہم ڈیموکریٹک پارٹی کو اب مہنگائی میں کمی اور اپنے دیگر انتخابی وعدوں پر عملدرآمد کے چیلنج کا بھی سامنا ہے۔