پاک فوج کا ضلع نیلم کی شونٹر ویلی میں فری میڈیکل کیمپ، مریضوں کا معائنہ

پاک فوج دفاعِ وطن کے ساتھ ساتھ عوامی خدمت اور فلاحی سرگرمیوں میں بھی ہمیشہ کی طرح پیش پیش ہے۔ اسی سلسلے میں آزاد جموں و کشمیر کے ضلع نیلم کے انتہائی دور افتادہ اور دشوار گزار علاقے شونٹر ویلی میں پاک فوج کے زیرِ اہتمام ایک روزیہ فری میڈیکل کیمپ کا انعقاد کیا گیا۔

میڈیکل کیمپ کے دوران پاک فوج کی تجربہ کار میڈیکل ٹیموں نے مقامی آبادی کو صحت کی بہترین سہولیات اور تفصیلی طبی مشاورت فراہم کی۔ کیمپ کے دوران مجموعی طور پر 450 سے زائد مریضوں کا معائنہ کیا گیا، جن میں 97 مرد، 118 خواتین اور 235 بچے شامل تھے۔

کیمپ میں آنے والے تمام افراد کو بالکل مفت تشخیصی خدمات اور معیاری ادویات بھی فراہم کی گئیں۔ شونٹر ویلی کے مکینوں نے پاک فوج کے اس جذبہ خیر سگالی کو سراہتے ہوئے شدید سردی اور سخت جغرافیائی حالات کے باوجود ان کی دہلیز پر مفت طبی سہولیات کی فراہمی پر افواجِ پاکستان کا شکر یہ ادا کیا۔