انٹرپول نے زلفی بخاری کیخلاف پاکستانی درخواست مسترد کر دی

پاکستان تحریک انصاف (پی ٹی آئی) کے رہنما زلفی بخاری کے خلاف انٹرپول کی جانب سے جاری کیا گیا ریڈ نوٹس منسوخ کر دیا گیا ہے، جبکہ انٹرپول نے ان کے خلاف تمام تحقیقات ختم کرنے کی باضابطہ تصدیق بھی کر دی ہے۔

ذرائع کے مطابق پاکستان کی جانب سے زلفی بخاری کی حوالگی کے لیے جمع کرائی گئی درخواست کو انٹرپول نے مسترد کر دیا۔ انٹرپول کی جانب سے زلفی بخاری کے وکلا کو ارسال کیے گئے خط میں کہا گیا ہے کہ پاکستان کی طرف سے فراہم کردہ معلومات اور شواہد کا تفصیلی جائزہ لینے کے بعد ریڈ نوٹس منسوخ کرنے کا فیصلہ کیا گیا۔

واضح رہے کہ تقریباً دو سال قبل وزارت داخلہ نے مونس الٰہی اور زلفی بخاری کے خلاف ریڈ نوٹس کے اجرا کے لیے انٹرپول سے رجوع کیا تھا۔ زلفی بخاری پر بانی پی ٹی آئی کی جوڈیشل کمپلیکس میں پیشی کے دوران مبینہ ہنگامہ آرائی اور دہشت گردی کے واقعات میں ملوث ہونے کے الزامات عائد کیے گئے تھے، جبکہ انہیں القادر ٹرسٹ کیس میں بھی پاکستانی حکام کو مطلوب قرار دیا گیا تھا۔

انٹرپول کے حالیہ فیصلے کے بعد زلفی بخاری کے خلاف عالمی سطح پر جاری قانونی کارروائی کا باب بند ہو گیا ہے۔