ای سی سی نے اربوں روپے کے دفاعی اورآبی منصوبوں کی منظوری دے دی

وفاقی وزیر برائے خزانہ و ریونیو سینیٹر محمد اورنگزیب کی زیر صدارت اقتصادی رابطہ کمیٹی (ECC) کے اعلیٰ سطحی اجلاس میں 54 ارب روپے کے دفاعی منصوبوں اور 275 ارب روپے کے آبی ترقیاتی پروجیکٹس کی تکنیکی ضمنی گرانٹس سمیت متعدد اہم فیصلے منظور کر لیے گئے ہیں۔

وزارتِ خزانہ کی جانب سے جاری کردہ اعلامیے کے مطابق، اجلاس میں پیش کردہ 11 نکاتی ایجنڈے کی منظوری دی گئی۔ دفاعی شعبے کے لیے منظور کی گئی 54 ارب روپے کی گرانٹ میں لینئج ایل 1000 طیارے کی شمولیت کے لیے 1 ارب 9 کروڑ 40 لاکھ روپے اور ‘پروجیکٹ استقلال’ کے لیے 29 ارب 13 کروڑ 90 لاکھ روپے شامل ہیں، جبکہ فرنٹیئر کور (FC) بلوچستان نارتھ کے ہیلی کاپٹر کی مرمت کے لیے بھی گرانٹ منظور کی گئی۔ علاوہ ازیں ای سی سی نے ملک میں سیکیورٹی اور پرائیویسی خدشات کے پیشِ نظر کیمرے نصب اسمارٹ گلاسز کی درآمد پر فوری پابندی کی منظوری دیتے ہوئے صوبائی حکومتوں کو ان کے استعمال سے متعلق ضوابط وضع کرنے کی سفارش کی۔

اجلاس میں وزیراعظم یوتھ بزنس اینڈ ایگریکلچر لون اسکیم کے ڈھانچے اور شرحِ سود میں تبدیلی کی منظوری دی گئی، جبکہ سرکاری کفایت شعاری سے حاصل ہونے والے 15 ارب 62 کروڑ 50 لاکھ روپے ’وزیراعظم کفایت شعاری فنڈ 2026‘ میں منتقل کرنے کا فیصلہ کیا گیا۔ صنعتی و زرعی ضرورت کے پیشِ نظر فاطمہ فرٹیلائزر اور ایگری ٹیک کاد کارخانوں کو 31 دسمبر 2026ء تک گیس کی فراہمی جاری رکھنے کی منظوری دی گئی، جبکہ گیس پیدا کرنے والے فیلڈز کے 5 کلومیٹر کے احاطے میں واقع دیہات میں گیس انفراسٹرکچر کی ترقی کے لیے مالی سال 27-2026ء کی مد میں 1 ارب روپے کی گرانٹ مختص کی گئی۔