کرم میں فتنہ الخوارج کی دراندازی ناکام، جوابی کارروائی میں افغان طالبان کی پوسٹیں تباہ

خیبر پختونخوا کے سرحدی ضلع کرم میں پاک افغان سرحد پر سیکیورٹی فورسز نے بروقت کارروائی کرتے ہوئے ‘فتنة الخوارج’ کے دہشت گردوں کی دراندازی کی ایک اور بڑی کوشش کو ناکام بنا دیا ہے۔

سیکیورٹی ذرائع کے مطابق یہ واقعہ اپر کرم کے شلوزان سیکٹر میں پیش آیا، جہاں فتنة الخوارج سے تعلق رکھنے والے دہشت گردوں نے افغان سرحد کی جانب سے پاکستان کی حدود میں داخل ہونے کی کوشش کی۔ وہاں تعینات پاک فوج اور سیکیورٹی فورسز کے جوانوں نے فوری الرٹ ہوتے ہوئے دہشت گردوں کی پیش قدمی کو مکمل طور پر روک دیا۔

ذرائع کا بتانا ہے کہ دراندازی ناکام ہونے پر سرحدی پار موجود افغان طالبان نے پاکستان کی سیکیورٹی فورسز کی چوکیوں پر بلااشتعال فائرنگ شروع کر دی۔ پاک فوج نے اس اشتعال انگیزی کا بھاری ہتھیاروں اور گولہ باری سے فوری، مؤثر اور بھرپور جواب دیا۔ اس شدید جوابی کارروائی کے نتیجے میں دہشت گردوں کا گینگ پسپا ہونے پر مجبور ہو گیا، جبکہ سرحدی پار افغان طالبان کی متعدد چوکیوں کو بھی شدید نقصان پہنچنے کی اطلاعات ہیں۔