اسحاق ڈار سے ایرانی سفیر کی ملاقات، دوطرفہ تعلقات اور علاقائی صورتحال پر گفتگو

پاکستان میں تعينات ایران کے سفیر نے اسلام آباد میں نائب وزیراعظم و وزیر خارجہ سینیٹر محمد اسحاق ڈار سے ملاقات کی، جس میں پاکستان اور ایران کے درمیان دوطرفہ تعلقات، تجارتی تعاون اور باہمی دلچسپ کے علاقائی و بین الاقوامی امور پر تفصیلی تبادلہ خیال کیا گیا۔

ترجمان دفتر خارجہ کے مطابق، نائب وزیراعظم اسحاق ڈار نے ایران کے ساتھ تاریخی، مذہبی اور برادرانہ تعلقات کو مزید مضبوط اور مستحکم بنانے کے پاکستان کے عزم کا اعادہ کیا۔ انہوں نے اس امر پر زور دیا کہ دونوں ممالک کے مابین اقتصادی اور سفارتی روابط کو فروغ دینا وقت کی اہم ضرورت ہے۔

ملاقات کے دوران مشرقِ وسطیٰ اور خطے کی مجموعی سیکیورٹی صورتحال پر بھی غور کیا گیا۔ نائب وزیراعظم اسحاق ڈار نے خطے میں پائیدار امن، خوشحالی اور استحکام کے قیام کے لیے تمام تنازعات کو مذاکرات اور مثبت سفارت کاری کے ذریعے حل کرنے کی اہمیت پر خصوصی زور دیا۔