مالیاتی خسارہ 2.5 فیصد پر آ گیا، زرمبادلہ ذخائر 21.5 ارب ڈالر کے ساتھ بلند ترین سطح پر پہنچ گئے: وزیر خزانہ محمد اورنگزیب

وفاقی وزیر خزانہ محمد اورنگزیب نے سینیٹ کی قائمہ کمیٹی برائے خزانہ کو بریفنگ دیتے ہوئے انکشاف کیا ہے کہ حکومت نے قلیل مدتی اور مہنگے قرضوں کو 5 سے 10 سالہ طویل مدتی قرضوں میں تبدیل کر کے ملک کو درپیش رول اوور کے سنگین خطرات سے نکال لیا ہے۔ انہوں نے بتایا کہ سخت مالیاتی نظم و ضبط کے باعث پاکستان کا مالیاتی خسارہ ساڑھے بارہ فیصد سے گھٹ کر 2.5 فیصد پر آ گیا ہے، جبکہ گزشتہ مالی سال کرنٹ اکاؤنٹ خسارہ جی ڈی پی کا محض 0.1 فیصد (30 کروڑ ڈالر) رہا۔ وزیر خزانہ کے مطابق ملکی تاریخ میں پہلی بار زرمبادلہ کے ذخائر 21.5 ارب ڈالر کی ریکارڈ سطح پر پہنچ چکے ہیں اور پاکستان کی عالمی کریڈٹ ریٹنگ ‘بی مائنس’ سے بہتر ہو کر ‘بی’ ہو گئی ہے، جسے ‘بی پلس’ اور بالآخر ‘ڈبل بی’ کیٹیگری تک لے جانا بنیادی ہدف ہے۔ انہوں نے مزید کہا کہ بیرونی قرضوں پر انحصار کم کیا جا رہا ہے، جس کے تحت رواں مالی سال بیرونی ادائیگیاں 4 ارب ڈالر اور آئندہ سال مزید کم ہو کر 3.5 ارب ڈالر رہ جائیں گی، تاہم تیل کی عالمی قیمتوں اور بڑھتی ہوئی درآمدات کے باعث کرنٹ اکاؤنٹ پر دباؤ کا محتاط انداز میں مقابلہ کیا جا رہا ہے۔