برطانیہ کا دہشتگردی کے خلاف جنگ میں پاکستان کے ساتھ تعاون جاری رکھنے پر اتفاق

پاکستان اور برطانیہ کے درمیان انسدادِ دہشت گردی پر دوطرفہ مذاکرات کا انعقاد کیا گیا جس میں خطے اور عالمی سطح پر سیکیورٹی کی صورتحال، سرحد پار متحرک دہشت گرد تنظیموں اور بالخصوص افغانستان سے سرگرم گروہوں سے لاحق خطرات پر تفصیلی تبادلہ خیال کیا گیا۔ ترجمان دفترِ خارجہ کے مطابق پاکستانی وفد کی قیادت ڈائریکٹر جنرل کاؤنٹر ٹیررازم ڈاکٹر فریحہ بگٹی نے کی، جبکہ برطانوی وفد نے پاکستان میں دہشت گردی کے واقعات میں انسانی جانوں کے ضیاع پر گہرے دکھ کا اظہار کرتے ہوئے متاثرہ خاندانوں سے تعزیت کی۔ مذاکرات کے دوران برطانیہ نے دہشت گردی کی جنگ میں پاکستان کے ساتھ بھرپور تعاون جاری رکھنے کے عزم کا اعادہ کیا اور علاقائی استحکام و عالمی سلامتی کے لیے اسلام آباد کی قربانیوں کا اعتراف کیا۔ دونوں فریقین نے سرحد پار دہشت گرد نیٹ ورکس کے خاتمے اور سیکیورٹی تعاون کی پیش رفت پر اتفاق کیا۔