8 فروری کو ملک گیر شٹر ڈاؤن اور پہیہ جام ہڑتال کے ساتھ یومِ سیاہ منانے کا اعلان

تحریک تحفظ آئین پاکستان کی جانب سے منعقدہ دو روزہ قومی مشاورتی کانفرنس کے اعلامیے میں صاف و شفاف انتخابات، آئین کی اصل روح کے مطابق عملدرآمد اور جمہوری نظام کی بحالی کا مطالبہ کیا گیا ہے۔ اعلامیے میں غیر جانبدار نئے چیف الیکشن کمشنر کی تقرری، 8 فروری 2024 کے انتخابات میں مبینہ دھاندلی کی آزادانہ تحقیقات اور ذمہ داروں کو سزا دینے پر زور دیا گیا۔

کانفرنس میں عدلیہ کی آزادی پر قدغن، آئینی ترامیم کے ذریعے ججز کے تبادلوں، سیاسی اسیران کی رہائی، میڈیا اور صحافت پر پابندیوں، پیکا قانون کے خاتمے اور انسانی حقوق کی خلاف ورزیوں کی مذمت کی گئی۔ معاشی صورتحال پر تشویش ظاہر کرتے ہوئے مہنگائی، بے روزگاری اور ظالمانہ ٹیکسوں کے خاتمے کا مطالبہ کیا گیا۔

اعلامیے میں سندھ، بلوچستان اور خیبرپختونخوا میں امن و امان، جبری گمشدگیوں، معدنی وسائل پر صوبائی حق، طلبہ یونینز کی بحالی اور افغانستان سے تعلقات کی بہتری پر بھی زور دیا گیا۔ لائحہ عمل کے تحت تحریک تحفظ آئین نے 8 فروری 2026 کو ملک گیر شٹر ڈاؤن اور پہیہ جام ہڑتال کے ساتھ یومِ سیاہ منانے کا اعلان کیا ہے۔