اپنی چھت، اپنا گھر سکیم: ایک لاکھ 28 ہزار سے زائد گھر مکمل

وزیراعلیٰ پنجاب مریم نواز شریف کی زیرِ صدارت انعقاد پذیر خصوصی اجلاس میں “اپنی چھت، اپنا گھر” پراجیکٹ کا تفصیلی جائزہ لیا گیا، جس میں اسکیم کے تحت نئی درخواستیں طلب کرنے کی منظوری دے دی گئی ہے۔ اجلاس کو بریفنگ دیتے ہوئے بتایا گیا کہ سکیم کے تحت اب تک 2 لاکھ 25 ہزار سے زائد قرضے جاری کیے جا چکے ہیں، جن میں سے 1 لاکھ 28 ہزار 718 گھر مکمل اور 62 ہزار سے زائد تعمیر کے آخری مراحل میں ہیں۔ منصوبے میں ریکوری کی شرح 97.6 فیصد رہی ہے جس کے تحت 22 ارب 29 کروڑ روپے موصول ہو چکے ہیں۔ اس کے علاوہ “اپنی چھت، محفوظ چھت” سکیم کے تحت بھی 3 ہزار سے زائد درخواست دہندگان کو 1 ارب 21 کروڑ روپے سے زائد کا قرض جاری کیا جا چکا ہے۔