غزہ کی تباہی عالمی نظام کے اخلاقی دعوؤں کا امتحان ہے: حافظ نعیم الرحمان

امیر جماعت اسلامی پاکستان حافظ نعیم الرحمان نے ترکیہ کے پارلیمنٹیریئنز اور حکمران ‘اق پارٹی’ کے رہنماؤں کی جانب سے دیے گئے استقبالیے سے خطاب کرتے ہوئے کہا ہے کہ غزہ کی تباہی، بھوک اور جبری بے دخلی عالمی نظام کے اخلاقی دعوؤں کا بڑا امتحان ہے۔ انہوں نے کہا کہ دنیا میں وسائل کی نہیں بلکہ اصولی اور دیانت دار قیادت کی کمی ہے، جبکہ امتِ مسلمہ کو مایوسی کے بجائے علم اور عمل کا راستہ اختیار کرنا ہوگا۔ حافظ نعیم الرحمان نے آزاد فلسطین اور مقبوضہ کشمیر کے عوام کے لیے انصاف کا مطالبہ کرتے ہوئے عالمی برادری سے فلسطینی تعلیمی، طبی اور امدادی اداروں کی بلا تعطل مدد اور اسرائیل کے بائیکاٹ کی اپیل کی۔ علاوہ ازیں، انہوں نے پاکستانی اور ترک نوجوانوں پر زور دیا کہ وہ مصنوعی ذہانت (AI)، سائبر سیکیورٹی، ڈیجیٹل میڈیا اور قابلِ تجدید توانائی کے شعبوں میں مشترکہ عملی تعاون کو فروغ دیں۔