اسرائیل کا ایران پر دوبارہ حملے کا منصوبہ، ممکنہ کارروائی پر امریکی صدر کو بریفنگ کا عندیہ

امریکی میڈیا نے دعویٰ کیا ہے کہ اسرائیل نے ایک بار پھر ایران پر حملے کا منصوبہ تیار کر لیا ہے، جبکہ اس ممکنہ کارروائی کے حوالے سے امریکی قیادت کو اعتماد میں لینے کی تیاری بھی کی جا رہی ہے۔

رپورٹس کے مطابق اسرائیلی وزیر اعظم ایران کے خلاف ممکنہ نئے حملوں پر امریکی صدر کو بریفنگ دینے کا ارادہ رکھتے ہیں۔ اسرائیلی حکام کا مؤقف ہے کہ ایران کے بیلسٹک میزائل پروگرام میں کسی بھی قسم کی توسیع اسرائیل کے لیے سنگین خطرہ ہے، جس کے جواب میں فوری کارروائی کی ضرورت پڑ سکتی ہے۔

امریکی میڈیا کے مطابق اسرائیلی حکام نے یہ دعویٰ بھی کیا ہے کہ ایران اپنے جوہری افزودگی کے مراکز دوبارہ بحال کر رہا ہے، جسے خطے میں کشیدگی میں اضافے کی بڑی وجہ قرار دیا جا رہا ہے۔

رپورٹس کے مطابق ایران سے متعلق ان خدشات پر واشنگٹن اور تل ابیب کے درمیان مشاورت جاری ہے، تاہم ممکنہ حملے کی نوعیت اور وقت کے بارے میں کوئی باضابطہ اعلان سامنے نہیں آیا۔