سال 2026 کی تیسری ذیلی قومی پولیو مہم کا آغاز، 2 کروڑ 40 لاکھ بچوں کو قطرے پلانے کا ہدف: وفاقی وزیر صحت مصطفیٰ کمال

اسلام آباد میں سال 2026 کی تیسری ذیلی قومی انسدادِ پولیو مہم کا باضابطہ آغاز کر دیا گیا ہے، جس کے تحت ملک بھر میں ڈھائی کروڑ کے قریب بچوں کو پولیو سے بچاؤ کے قطرے پلائے جائیں گے۔

وفاقی وزیرِ صحت مصطفیٰ کمال نے نیشنل ایمرجنسی آپریشنز سینٹر (EOC) میں انسدادِ پولیو مہم کا افتتاح کرتے ہوئے بتایا کہ آج سے شروع ہونے والی اس مہم کے دوران ملک بھر میں 2 کروڑ 40 لاکھ بچوں کو پولیو کے قطرے پلائے جائیں گے۔ انہوں نے واضح کیا کہ یہ مہم ملک بھر کے 97 مخصوص اضلاع کو مدنظر رکھ کر انتہائی حکمت عملی کے ساتھ ڈیزائن کی گئی ہے۔ پولیو کے اعداد و شمار پر بات کرتے ہوئے وفاقی وزیر نے انکشاف کیا کہ سال 2026 میں اب تک ملک بھر سے پولیو کے 7 کیسز رپورٹ ہو چکے ہیں، جن میں سے 5 کیسز خیبرپختونخوا اور 2 سندھ کے مختلف علاقوں سے سامنے آئے ہیں۔ انہوں نے افسوس کا اظہار کیا کہ جن علاقوں سے یہ کیسز رپورٹ ہوئے ہیں، وہاں سیکیورٹی یا رسائی کے مسائل کی وجہ سے پولیو ٹیمیں بروقت نہیں پہنچ سکی تھیں۔

مصطفیٰ کمال نے زور دیا کہ پولیو ایک لاعلاج مرض ہے اور اس کا واحد علاج صرف اور صرف بار بار پولیو کے قطرے پلانا ہے۔ انہوں نے کہا کہ حکومت اور تمام ملکی و غیر ملکی معاون اداروں کی مشترکہ کوشش پاکستان کو مکمل طور پر پولیو فری بنانا ہے، کیونکہ اس وقت دنیا کے صرف دو ممالک میں ہی پولیو وائرس باقی رہ گیا ہے۔ انہوں نے بتایا کہ یہ ذیلی قومی انسدادِ پولیو مہم 2 نومبر سے 8 نومبر تک ملک بھر میں جاری رہے گی۔

صوبہ وار تفصیلات بتاتے ہوئے وفاقی وزیر نے کہا کہ پنجاب کے 13 اضلاع میں 92 لاکھ 78 ہزار بچوں کو پولیو ویکسین پلائی جائے گی، سندھ کے 20 اضلاع میں 68 لاکھ 83 ہزار بچوں، خیبر پختونخوا کے 27 اضلاع میں 48 لاکھ 8 ہزار بچوں، اور بلوچستان کے 31 اضلاع میں 22 لاکھ 17 ہزار بچوں کو حفاظتی قطرے پلائے جائیں گے۔ اس کے علاوہ وفاقی دارالحکومت اسلام آباد میں 4 لاکھ 47 ہزار بچوں کو قطرے پلائے جائیں گے، جبکہ گلگت بلتستان کے 3 اور آزاد کشمیر کے 2 اضلاع میں بھی بچوں کو پولیو سے بچاؤ کی ویکسین دی جائے گی۔