امت مسلمہ کو فرقہ واریت سے بچانے کیلئے علماء مشترکہ لائحہ عمل بنائیں: حافظ نعیم

امیر جماعت اسلامی پاکستان حافظ نعیم الرحمان نے استنبول میں منعقدہ بین الاقوامی کانفرنس سے خطاب کرتے ہوئے کہا ہے کہ امتِ مسلمہ کو انتہاپسندی، تکفیر اور فرقہ واریت کی لعنت سے بچانے کے لیے تمام جید علمائے کرام کو مل بیٹھ کر ایک مشترکہ اور جامع لائحہ عمل مرتب کرنا چاہیے۔

استنبول میں ‘اتحاد العالم الإسلامي للعلماء المسلمين’ کے زیراہتمام منعقدہ دو روزہ بین الاقوامی کانفرنس سے خطاب کرتے ہوئے حافظ نعیم الرحمان کا کہنا تھا کہ فلسطین اور کشمیر کے دیرینہ تنازعات کے حل کے لیے قرآن و سنت کی روشنی میں ایک واضح پالیسی اپنانے کی اشد ضرورت ہے، جبکہ دنیا بھر میں بسنے والی مسلم اقلیتوں کے حقوق کے تحفظ کے لیے ایک مؤثر عالمی پلیٹ فارم بھی قائم کیا جانا چاہیے۔ انہوں نے اس بات پر زور دیا کہ مسلم ممالک کے باہمی اختلافات اور کشیدگی کا خاتمہ صرف اور صرف مخلصانہ باہمی تعاون اور مشترکہ مفادات کے تحفظ کے اصول پر عمل پیرا ہو کر ہی ممکن ہے۔

حافظ نعیم الرحمان نے خبردار کیا کہ صیہونیت ہمیشہ سے امت مسلمہ کے داخلی اختلافات سے فائدہ اٹھا کر مسلمانوں کو آپس میں لڑانے کی سازش کرتی چلی آئی ہے، لہٰذا ہمیں دشمن کی اس گھناؤنی سازش کو ہر صورت ناکام بنانا ہوگا۔ ان کا کہنا تھا کہ موجودہ دور میں مسلم اسکالرز کی یہ بنیادی ذمہ داری بنتی ہے کہ وہ امت مسلمہ کے عوام اور حکمرانوں کو موجودہ سنگین مشکلات سے نکالنے کے لیے عملی حکمت عملی دیں۔ انہوں نے مثال دیتے ہوئے کہا کہ پاکستان میں ‘ملی یکجہتی کونسل’ کا 70 نکاتی ضابطۂ اخلاق اس بات کا واضح ثبوت ہے کہ باہمی مکالمے اور گفت و شنید کے ذریعے بڑے سے بڑے اختلافات کو بھی خوش اسلوبی سے حل کیا جا سکتا ہے۔

مسلم دنیا کے معاشی اور سماجی چیلنجز پر بات کرتے ہوئے امیر جماعت اسلامی نے تجویز دی کہ مسلم حکومتوں کو اپنے وسائل جنگ و جدل کے بجائے معیاری تعلیم، سستے انصاف، معاشی خوشحالی اور جدید ٹیکنالوجی کے فروغ پر خرچ کرنے چاہئیں۔ انہوں نے کہا کہ دنیا میں آباد دو ارب مسلمانوں میں ایک ارب خواتین شامل ہیں، جن کے مسائل کا حل عصری تقاضوں اور شریعت کی حدود میں رہ کر تلاش کرنا ہوگا۔ ملازمت پیشہ خواتین کا ذکر کرتے ہوئے ان کا کہنا تھا کہ موجودہ حالات کے تناظر میں خواتین کو گھروں تک محدود نہیں کیا جا سکتا۔