تحریک تحفظ آئین کانفرنس: اس فیصلے کی جتنی بھی مذمت کی جائے کم ہے، وزیر اعلیٰ کے پی کے

تحریک تحفظ آئین کانفرنس سے خطاب کرتے ہوئے وزیر اعلیٰ خیبرپختونخوا سہیل آفریدی نے حالیہ عدالتی فیصلے کو ناانصافی پر مبنی قرار دیا اور کہا کہ اس فیصلے کی جتنی بھی مذمت کی جائے کم ہے۔

انہوں نے کہا کہ 26ویں اور 27ویں آئینی ترامیم سے پہلے ہی عوامی مینڈیٹ پر ڈاکا ڈالا جا چکا تھا اور موجودہ صورتحال میں عدالتیں صرف فیصلے کر رہی ہیں، انصاف فراہم نہیں کر رہیں۔ وزیر اعلیٰ کے پی کے کا کہنا تھا کہ ان کے قائد اور بشریٰ بی بی بے قصور ہیں اور کچھ لوگ چور ہیں، مگر عدالتیں ہمیشہ ایسی نہیں رہیں گی۔

سہیل آفریدی نے کہا کہ یہ جنگ تمام جمہوری قوتوں کی مشترکہ جنگ ہے۔ انہوں نے ملکی معاشی صورتحال کا حوالہ دیتے ہوئے کہا کہ آج پاکستان 80 ہزار ارب روپے کا مقروض ہے اور جی ڈی پی کا 72 فیصد قرضے تلے دبا ہوا ہے۔

انہوں نے واضح کیا کہ جو لوگ غلط فیصلے کرتے ہیں ان کے خلاف آواز اٹھائی جائے گی اور نظام اس وقت بہتر ہوگا جب ہم ایک دوسرے کی قدر کریں گے۔ وزیر اعلیٰ کے پی کے نے کہا کہ چاہے مزاحمتی تحریک ہو یا مذاکراتی عمل، خیبرپختونخوا حکومت تحریک تحفظ آئین کے فیصلوں کے ساتھ کھڑی ہوگی۔