نوجوانوں کو ہنر مند بنانے اور آئی ٹی کے فروغ پر توجہ دے رہے ہیں، ملتان چیمبر آف کامرس میں چیئرمین سینیٹ سید یوسف رضا گیلانی کا خطاب

چیئرمین سینیٹ سید یوسف رضا گیلانی نے ملتان چیمبر آف کامرس اینڈ انڈسٹری کے دورے کے موقع پر تقریب سے خطاب کرتے ہوئے کہا ہے کہ ملتان کی تہذیب و ثقافت پانچ ہزار سال پرانی ہے اور وہ بیرونی دوروں اور سفیروں سے ملاقاتوں میں ہمیشہ ملتان کے ثقافتی ورثے اور ہینڈی کرافٹس کو اجاگر کرتے ہیں۔ انہوں نے چیمبر کے نومنتخب عہدیداران کو مبارکباد پیش کرتے ہوئے اس عزم کا اعادہ کیا کہ کاروباری برادری کے تمام مسائل کے حل کے لیے ان کے دفاتر کے دروازے ہمیشہ کھلے ہیں۔

سید یوسف رضا گیلانی کا کہنا تھا کہ پاکستان کی 60 فیصد آبادی نوجوانوں پر مشتمل ہے جن کا رجحان زیادہ تر انفارمیشن ٹیکنالوجی کی طرف ہے، اس لیے ضروری ہے کہ نوجوانوں کو جدید ہنر (سکلڈ ٹریننگ) سے آراستہ کیا جائے۔ انہوں نے مثال دی کہ اٹلی والے چاہتے ہیں کہ پاکستان سے 10 ہزار ہنر مند نوجوان ان کے پاس آ کر کام کریں۔ انہوں نے کہا کہ ملتان میں آئی ٹی پارک کے قیام کے لیے بلاول بھٹو زرداری نے ایک ارب روپے مختص کیے ہیں جبکہ ملتان اکنامکس زون کے فروغ کے لیے بھی وزیراعظم اور متعلقہ حکام سے بات چیت جاری ہے۔

ماضی کے ترقیاتی کاموں کا ذکر کرتے ہوئے انہوں نے بتایا کہ محترمہ بینظیر بھٹو کی ہدایت پر ہیڈ محمد والا پل کی تعمیر کو ترجیح دی گئی تھی، اسی طرح گیلانی لا کالج کی نشستوں میں اضافہ، ملتان کیڈٹ کالج کا قیام، فاطمہ یونیورسٹی کے قیام کی کوششیں اور بین الاقوامی ہوائی اڈے کا قیام اس خطے کی ترقی میں سنگِ میل کی حیثیت رکھتے ہیں۔ انہوں نے مزید کہا کہ جب تک جنوبی پنجاب کا الگ صوبہ نہیں بنتا، اس وقت تک اس خطے کے تمام دیرینہ مسائل مکمل طور پر حل نہیں ہو سکتے اور نہ ہی لاہور اور دیگر بڑے شہروں کا مقابلہ کیا جا سکتا ہے۔ آخر میں انہوں نے یقین دہانی کرائی کہ تعلیم، صحت، روزگار کے مواقع اور تجارتی سہولیات کی فراہمی کے لیے چیمبر آف کامرس کے ساتھ مل کر بھرپور کوششیں جاری رکھی جائیں