گورنر خیبرپختونخوا کا قبضہ مافیا اور تجاوزات کیخلاف دو ٹوک اعلان

گورنر خیبر پختونخوا فیصل کریم کنڈی نے قبضہ مافیا اور تجاوزات کے خلاف دو ٹوک مؤقف اپناتے ہوئے اعلان کیا ہے کہ جو لوگ سرکاری یا غیر قانونی زمینوں اور تجاوزات پر قابض ہیں، انہیں ہر صورت وہاں سے ہٹنا پڑے گا۔

گورنر کے پی نے واضح الفاظ میں کہا کہ وہ ذاتی طور پر کسی کی بھی سفارش نہیں کرتے، اور اگر ان کا اپنا گھر بھی تجاوزات کے زمرے میں آتا ہے تو اسے بھی بلا جھجھک گرا دیا جائے۔ مفتی محمود مرکز کے حوالے سے گفتگو کرتے ہوئے فیصل کریم کنڈی کا کہنا تھا کہ صوبائی مشیرِ اطلاعات نے بھی گزشتہ روز واضح کیا تھا کہ جن افراد نے تجاوزات پر ناجائز قبضہ کر رکھا ہے وہ فوری طور پر جگہ خالی کر دیں، جبکہ مفتی محمود مرکز کی قانونی حیثیت اور دیگر امور پر متعلقہ ضلعی انتظامیہ ہی حتمی فیصلہ کرے گی۔

انہوں نے کڑے الفاظ میں تنقید کرتے ہوئے کہا کہ جو لوگ عامتہ الناس کو انصاف اور دین کا درس دیتے ہیں لیکن خود قبضہ مافیا بن بیٹھے ہیں، وہ دوسروں کو کیا سبق یا ہدایت دیں گے۔ گورنر کا کہنا تھا کہ حکمران اور بااثر شخصیات ہمیشہ عوام کے لیے ایک مثال ہوتے ہیں، اس لیے اگر کوئی عالمِ دین خود قبضہ مافیا میں ملوث ہو جائے اور پھر الٹا ‘چوری اور سینہ زوری’ کا مظاہرہ کرے تو یہ کسی بھی طرح درست اور قابلِ قبول نہیں ہے۔ فیصل کریم کنڈی نے عزم ظاہر کیا کہ تجاوزات کے خاتمے سے جڑے تمام معاملات کو متعلقہ محکمے پوری شفافیت کے ساتھ منطقی انجام تک پہنچا رہے ہیں۔