پی آئی اے کے طیارے کی سعودی عرب میں ہنگامی لینڈنگ، تمام مسافر محفوظ

لاہور آنے والی پاکستان انٹرنیشنل ایئرلائن (پی آئی اے) کی پرواز پی کے 860 کو سعودی عرب میں ہنگامی لینڈنگ کرنا پڑ گئی۔ طیارہ جدہ سے مسافروں کو لے کر لاہور آ رہا تھا کہ دورانِ پرواز فنی خرابی پیدا ہو گئی۔

خرابی کے باعث طیارے کو دمام ایئرپورٹ اتار لیا گیا، جہاں ہنگامی لینڈنگ کے دوران جہاز میں آکسیجن ماسک کھل گئے۔ طیارے میں 350 سے زائد مسافر سوار تھے، تاہم جہاز کو بحفاظت دمام ایئرپورٹ پر لینڈ کروا لیا گیا۔

ہنگامی لینڈنگ کے موقع پر دمام ایئرپورٹ پر ایمرجنسی نافذ کی گئی۔ پی آئی اے انتظامیہ کے مطابق تمام مسافر محفوظ ہیں اور انہیں لاہور پہنچانے کیلئے متبادل طیارہ پاکستان سے روانہ کر دیا گیا ہے۔