پاکستان کا خلیجی جنگ میں لاپتہ افراد کی تلاش اور شناخت کا عمل تیز کرنے پر زور

پاکستان نے اقوام متحدہ کی سلامتی کونسل پر زور دیا ہے کہ سن 1990 میں عراق کے کویت پر حملے کے بعد سے لاپتہ ہونے والے کویتی شہریوں کی تلاش، شناخت اور ان کے انجام کا تعین کرنے کے عمل کو مزید تیز کیا جائے تاکہ کئی دہائیوں سے اپنے پیاروں کے منتظر خاندانوں کو ذہنی سکون مل سکے۔

اقوام متحدہ میں پاکستان کے قائم مقام مستقل مندوب عثمان جادون نے سلامتی کونسل کے اجلاس سے خطاب کرتے ہوئے اس بات پر گہری تشویش کا اظہار کیا کہ رپورٹ کے زیرِ جائزہ عرصے کے دوران کسی بھی نئے لاپتہ شخص کی شناخت نہیں ہو سکی۔ انہوں نے کہا کہ 1990 اور 1991 کے المناک واقعات کے دیرپا انسانی اثرات کو ختم کرنے کے لیے لاپتہ کویتی شہریوں اور تیسرے ممالک کے لاپتہ افراد کے انجام کا تعین کرنا، ان کی باقیات کو احترام کے ساتھ اہل خانہ کے حوالے کرنا اور کویتی املاک کی واپسی کے لیے ہنگامی بنیادوں پر اقدامات ناگزیر ہیں۔ عثمان جادون نے عراق اور کویت کی جانب سے باہمی احترام کے عزم کا خیرمقدم کرتے ہوئے امید ظاہر کی کہ یہ مثبت سفارتی پیش رفت لاپتہ افراد کی تلاش اور سرکاری دستاویزات کی واپسی کے عمل کو آگے بڑھانے میں اہم بنیاد ثابت ہوگی۔ پاکستانی مندوب نے اس امر پر بھی زور دیا کہ کویتی املاک، خصوصاً قومی آرکائیوز اور تاریخی ریکارڈ کی تلاش اور ان کی مکمل واپسی کو اولین ترجیح دی جانی چاہئے۔