بھارتی جیلوں سے رہائی پانے والے 4 پاکستانی ماہی گیر ایدھی فاؤنڈیشن کے حوالے

بھارتی جیلوں سے 9 سال بعد رہائی پانے والے چار پاکستانی ماہی گیروں کو واہگہ / سندھ سرحد پر پاکستانی حکام سے وصولی کے بعد ایدھی فاؤنڈیشن کے حوالے کر دیا گیا ہے۔ ترجمان ایدھی فاؤنڈیشن کے مطابق رہا ہونے والوں میں احمد نواز، عبدالرحمٰن، وقاص علی اور ارشد شامل ہیں۔ کراچی کے علاقے کورنگی سے تعلق رکھنے والے احمد نواز اور عبدالرحمٰن کے علاوہ دیگر دو ماہی گیر فی الحال اپنے مکمل پتے بتانے سے قاصر ہیں۔ ایدھی حکام کا کہنا ہے کہ چاروں ماہی گیر گزشتہ 9 سال سے بھارت میں قید کاٹ رہے تھے، جنہیں اب چیئرمین ایدھی فاؤنڈیشن فیصل ایدھی کی ہدایت پر ان کے آبائی علاقوں تک پہنچانے کے لیے تمام سفری سہولیات بلا معاوضہ فراہم کی جا رہی ہیں۔