قصور: 2 نابالغ بچیوں کے زبردستی نکاح کی کوشش ناکام بنا دی گئی

ضلع قصور کے علاقے منڈی عثمان والا میں پولیس نے بروقت کارروائی کرتے ہوئے دو نابالغ بچیوں کا زبردستی نکاح پڑھوانے کی کوشش کو ناکام بنا دیا ہے۔ پولیس کے مطابق 10 سالہ اور 16 سالہ بچیوں کا زبردستی نکاح کرایا جا رہا تھا جس پر فوری اقدام کرتے ہوئے دونوں دلہوں، نکاح خواں اور گواہ کو موقع پر گرفتار کر لیا گیا۔ پولیس نے کمسن بچیوں کی شادی کی کوشش پر متعلقہ دفعات کے تحت مقدمہ درج کر کے بچیوں کو حفاظت کی خاطر دارالامان منتقل کر دیا ہے جبکہ گرفتار ملزمان کے خلاف قانونی کارروائی جاری ہے۔