مری: گاڑی کھائی میں گرنے سے خواتین، بچوں سمیت 7 افراد جاں بحق

پنجاب کے سیاحتی علاقے مری میں ایک دردناک ٹریفک حادثے کے نتیجے میں گاڑی گہری کھائی میں جا گری، جس کے باعث خواتین اور بچوں سمیت 7 افراد جاں بحق جبکہ 7 سے زائد زخمی ہو گئے۔

حادثے میں معجزانہ طور پر محفوظ رہنے والی خاتون نگہت بی بی کے مطابق گاڑی میں مجموعی طور پر 17 افراد سوار تھے۔ سفر کے دوران گاڑی اچانک بے قابو ہو کر گہری کھائی میں جا گری، جس کے بعد گاڑی میں موجود گیس سلنڈر پھٹنے سے ہولناک آگ بھڑک اٹھی۔ آگ کی شدت اتنی تیز تھی کہ کئی افراد جھلس کر جاں بحق ہو گئے اور بعض میتیں ناقابلِ شناخت ہو چکی ہیں۔

واقعے کی اطلاع ملتے ہی امدادی ٹیموں نے موقع پر پہنچ کر لاشوں اور زخمیوں کو نکال کر ہولی فیملی ہسپتال راولپنڈی منتقل کر دیا، جہاں ریسکیو حکام کے مطابق 2 زخمیوں کی حالت انتہائی تشویشناک بتائی جا رہی ہے۔