خیبرپختونخوا وفاق کے تعاون کے بغیر نہیں چل سکتا، دہشتگردی کیخلاف ملکر لڑنا ہوگا: گورنر

گورنر خیبرپختونخوا فیصل کریم کنڈی نے صوابی میں میڈیا سے گفتگو کرتے ہوئے کہا ہے کہ صوبے کے مسائل کا پائیدار حل وفاق کے ساتھ تصادم کے بجائے بہتر تعلقات اور باہمی تعاون میں مضمر ہے۔ انہوں نے زور دیا کہ دہشت گردی کے خلاف جنگ سیکیورٹی فورسز کی قربانیوں کی بدولت مشترکہ طور پر لڑنی ہوگی، جبکہ صوبے میں تعلیم، صحت اور قانونی مساوات کو یقینی بنانا ترجیح ہے۔ دریں اثنا، گورنر ہاؤس پشاور میں ’زلمی مدرسہ کرکٹ لیگ‘ کی ٹرافی کی رونمائی کی تقریب سے خطاب کرتے ہوئے انہوں نے کہا کہ کھیل نوجوانوں اور مدارس کے طلبہ کو انتہا پسندی سے دور رکھنے کا بہترین ذریعہ ہیں۔ گورنر فیصل کریم کنڈی نے تجویز پیش کی کہ دنیا کو امن کا مثبت پیغام دینے کے لیے پاکستان سپر لیگ (PSL) کی اگلی افتتاحی تقریب پشاور میں منعقد کی جائے۔