دھند کے باعث موٹروے ایم ٹو، ایم تھری اور ایم الیون بند، موٹروے پولیس کی شہریوں کو احتیاطی ہدایات

لاہور میں شدید دھند کے باعث مختلف موٹرویز کو ٹریفک کے لیے بند کر دیا گیا ہے۔ موٹروے پولیس سنٹرل ریجن کے ترجمان سید عمران احمد کے مطابق موٹروے ایم ٹو لاہور سے کوٹ مومن تک جبکہ لاہور سیالکوٹ موٹروے ایم الیون دھند کی وجہ سے بند کر دی گئی ہے۔

ترجمان کے مطابق موٹروے ایم تھری پر لاہور سے سمندری تک سفر بھی دھند کے باعث متاثر ہے۔ موٹرویز کی بندش کا مقصد عوام کی جان و مال کا تحفظ یقینی بنانا ہے۔

سید عمران احمد نے کہا کہ دھند کے دوران لین کی خلاف ورزی خطرناک حادثات کا سبب بن سکتی ہے، اس لیے روڈ یوزرز لین ڈسپلن پر سختی سے عمل کریں۔ شہریوں کو مشورہ دیا گیا ہے کہ غیر ضروری سفر سے گریز کریں اور دن کے اوقات میں سفر کو ترجیح دیں۔

ترجمان کے مطابق دھند میں صبح 10 بجے سے شام 6 بجے تک کے اوقات نسبتاً محفوظ سمجھے جاتے ہیں۔ ڈرائیور حضرات فوگ لائٹس کا استعمال یقینی بنائیں، تیز رفتاری سے اجتناب کریں اور آگے چلنے والی گاڑی سے مناسب فاصلہ رکھیں۔

موٹروے پولیس نے شہریوں کو مزید رہنمائی اور مدد کے لیے ہیلپ لائن 130 پر رابطہ کرنے کی ہدایت بھی کی ہے۔