کہنیوں میں اسکریو ڈرائیور سے سوراخ کیے گئے، حنا جاوید قتل کیس میں پوسٹ مارٹم رپورٹ سامنے آگئی

وفاقی دارالحکومت اسلام آباد میں قتل ہونے والی حنا جاوید کیس کی دل دہلا دینے والی پوسٹ مارٹم رپورٹ سامنے آ گئی ہے، جس نے ملزمان کے وحشیانہ تشدد کے خوفناک حقائق کو بے نقاب کر دیا ہے۔

پوسٹ مارٹم رپورٹ کے مطابق مقتولہ کی کہنیوں میں اسکریو ڈرائیور (پچکس) سے سوراخ کیے گئے تھے جبکہ ان کے سر کے پچھلے حصے پر 27 سینٹی میٹر گہرا زخم پایا گیا۔ رپورٹ میں تصدیق کی گئی ہے کہ تشدد کے باعث حنا جاوید کی گردن ٹوٹی ہوئی تھی اور ان کے چہرے، بازوؤں، ہاتھوں اور ہونٹوں پر شديد زخموں اور نیل کے نشانات موجود تھے۔

واضح رہے کہ حنا جاوید کو 20 اگست کو گھر کے اندر بدترین تشدد کا نشانہ بنا کر قتل کیا گیا تھا، جس کے بعد ان کی لاش باتھ روم میں شاور کے ساتھ لٹکی ہوئی ملی تھی۔ پولیس نے کیس میں نامزد مقتولہ کے شوہر فیصل اصغر اور گھریلو ملازم ذیشان ارشد کو گرفتار کر کے جوڈیشل ریمانڈ پر اڈیالہ جیل منتقل کر رکھا ہے۔

مقتولہ کے اہلخانہ نے مقامی پولیس کی تفتیش پر شدید عدم اعتماد کا اظہار کرتے ہوئے واقعے کی شفاف تحقیقات کے لیے جوڈیشل کمیشن تشکیل دینے کا مطالبہ کیا ہے۔ دوسری جانب پارلیمنٹ کی داخلہ کمیٹی نے بھی کیس کا سخت نوٹس لیتے ہوئے 29 اکتوبر کو اسلام آباد پولیس کے اعلیٰ افسران اور مقتولہ کے لواحقین کو پیشی کے لیے طلب کر لیا ہے۔