لاہور ہائیکورٹ کا موٹروے اور ملتان میں شجرکاری منصوبوں پر عمل درآمد کا حکم

لاہور ہائیکورٹ نے ماحولیاتی تحفظ اور شجرکاری سے متعلق درخواست پر سماعت کرتے ہوئے ایم تھری موٹروے (M-3) اور ملتان کی اہم شاہراہوں پر شجرکاری کے منصوبوں پر بروقت عمل درآمد کی ہدایت جاری کی ہے۔ عدالت نے قرار دیا کہ شجرکاری کی حقیقی کامیابی کا تعین صرف پودے لگانے سے نہیں بلکہ ان کی بقا اور صحت مند نشوونما سے ہوتا ہے۔

جسٹس جواد حسن نے درخواست پر سماعت کرتے ہوئے متعلقہ اداروں کی پیش کردہ رپورٹس کا جائزہ لیا۔ سماعت کے دوران عدالت کو بتایا گیا کہ اکتوبر 2026ء کے دوران M-3 موٹروے کے سروس ایریاز میں 5 ہزار 280 پودے لگائے گئے ہیں اور 36 کلومیٹر کے حصے پر پھل دار درختوں کی خریداری کا عمل جاری ہے۔ اس کے علاوہ مالی سال 27-2026ء کے دوران ضلع ملتان کی اہم شاہراہوں پر 85.5 کلومیٹر کے رقبے میں 28 ہزار 215 پودے لگانے کا منصوبہ تیار کیا گیا ہے۔

عدالت نے ‘ایک طالب علم، ایک پودا’ مہم کی تعریف کی اور اداروں کو ہدایت کی کہ شجرکاری میں نیم، شیشم اور پیپل جیسے مقامی و سایہ دار درختوں کو ترجیح دی جائے جو حیاتیاتی تنوع کے لیے بھی مفید ہوں۔ ہائیکورٹ نے زیرِ التوا تمام منظوریوں کو جلد مکمل کرنے کا حکم دیا۔