پاکستان اور دنیا بھر میں پاکستانی سفارتی مشنز پر ای پاسپورٹ کا اجرا شروع

پاکستان سمیت دنیا بھر میں واقع پاکستانی سفارتی مشنز پر جدید ای پاسپورٹ کا اجراء باقاعدہ طور پر شروع کر دیا گیا ہے۔ ڈائریکٹوریٹ جنرل امیگریشن اینڈ پاسپورٹس کے مطابق وزیراعظم اور وزیر داخلہ محسن نقوی کی ہدایات پر عمل درآمد کرتے ہوئے پاسپورٹ سروسز کو جدید بین الاقوامی معیار پر استوار کرنے کے لیے یہ سنگ میل حاصل کیا گیا ہے۔ جدید ترین سکیورٹی خصوصیات سے لیس ای پاسپورٹ کے اجرائے اقدام کو “ایک قوم، ایک پاسپورٹ، ایک پہچان” کے وژن کا اہم حصہ قرار دیا گیا ہے۔ ڈی جی امیگریشن اینڈ پاسپورٹس نے وضاحت کی ہے کہ پہلے سے جاری شدہ مشین ریڈ ایبل پاسپورٹ اپنی میعاد ختم ہونے تک کارآمد رہیں گے، جبکہ اب نئے بننے والے یا تجدید شدہ پاسپورٹس کے لیے ای پاسپورٹ جاری کیا جائے گا۔