کراچی: بین الاقوامی خفیہ ایجنسی کی اطلاع پر آن لائن نیٹ ورک کے شکنجے میں پھنسی بچی کو بچا لیا گیا

بین الاقوامی خفیہ ایجنسی کی نشاندہی پر نیشنل سائبر کرائم انویسٹی گیشن ایجنسی (NCCIA) کراچی نے بروقت اور بڑی کارروائی کرتے ہوئے خطرناک آن لائن نیٹ ورک کے جال میں پھنسی 13 سالہ بچی کو بحفاظت بچا لیا ہے۔

این سی سی آئی اے حکام کے مطابق متاثرہ بچی کو مبینہ طور پر ڈارک ویب (Dark Web) سے منسلک ایک موذی گروہ کی جانب سے مختلف خطرناک “ٹاسکس” دیے جا رہے تھے۔ اس گروہ نے پہلے ٹاسک کے طور پر بچی سے ایک بلی کو زہر دے کر مارنے کا عمل کروایا، جبکہ دوسرے ٹاسک میں اسے خود کو شدید جسمانی نقصان پہنچانے کا حکم دیا گیا تھا۔

حکام نے بتایا کہ ٹاسک کی تکمیل اور کسی ناخوشگوار واقعے سے قبل ہی این سی سی آئی اے کی ٹیم نے بچی کا سراغ لگا کر اس تک رسائی حاصل کی اور والدین کو تمام صورتحال سے آگاہ کیا۔ بچی کے والدین اس کی اس خطرناک آن لائن سرگرمی سے مکمل طور پر لاعلم تھے۔ ادارے کے مطابق کیس کی تفتیش جاری ہے، بچی سے رابطہ قائم کرنے والے سوشل میڈیا اور آن لائن اکاؤنٹس کو ٹریس کیا جا رہا ہے اور اس پہلو پر بھی تحقیقات کی جا رہی ہیں کہ آیا اس نیٹ ورک نے دیگر پاکستانی بچوں کو بھی ہدف بنایا ہے یا نہیں