اسلام آباد میں گردوں کی غیر قانونی پیوندکاری میں ملوث گروہ بے نقاب، 5 ملزم گرفتار

وفاقی تحقیقاتی ادارے (FIA) کے اینٹی کرپشن سرکل نے گردوں کی غیر قانونی پیوندکاری میں ملوث ایک خطرناک اور منظم گروہ کا پردہ فاش کرتے ہوئے 5 ملزمان کو گرفتار کر لیا ہے۔

ایف آئی اے حکام کے مطابق گرفتار ملزمان کے قبضے سے 10 لاکھ روپے نقدی اور 3 گاڑیاں برآمد کی گئی ہیں، جبکہ ملزمان کی 8 کروڑ 75 لاکھ روپے مالیت کی جائیدادیں منجمد کر کے گاڑیوں کی رجسٹریشن منسوخ کروا دی گئی ہے۔ یہ گروہ بغیر کسی طبی ڈگری کے رہائشی مکانات، نجی ہاؤسنگ سوسائٹیوں اور پشاور کے مختلف مقامات پر غیر قانونی سرجریز اور اعضا کی پیوندکاری کر رہا تھا۔ ملزمان نے ڈونر رمضان ارشد کا گردہ غیر قانونی طور پر نکال کر پیوندکاری کے لیے شہری سے 30 لاکھ روپے وصول کیے، جس میں سے ڈونر کو محض 4 لاکھ اور ایجنٹوں کو 60 ہزار روپے دیے گئے تھے۔

ترجمان ایف آئی اے کا کہنا ہے کہ اس نیٹ ورک میں ڈاکٹرز، نرسز، لیبارٹری عملہ اور میڈیکل ٹیکنیشن شامل تھے، جو اسلام آباد کے ایک ہسپتال کے ذریعے ڈائلائسز، کراس میچ اور دیگر ٹیسٹ غیر قانونی طور پر کرواتے تھے۔ ایف آئی اے نے ملزمان کے تمام متعلقہ بینک اکاؤنٹس منجمد کرنے کے لیے بینکوں کو خطوط ارسال کر دیے ہیں اور مزید تحقیقات جاری ہیں۔