خیبر پختونخوا میں ایمرجنسی اور عوامی مینڈیٹ پر ڈاکا نا قابلِ قبول، گرفتار و مغوی رہنماؤں کی فوری بازیابی کی جائے: پی ٹی آئی

پاکستان تحریک انصاف (پی ٹی آئی) نے خیبر پختونخوا میں گورنر راج اور ایمرجنسی کے نفاذ کو عوامی مینڈیٹ اور جمہوری حقوق کی سنگین پامالی قرار دیتے ہوئے کہا ہے کہ طاقت کے زور پر مسترد شدہ ٹولے کو مسلط کرنے کا مقصد دہشت گردی کا خاتمہ نہیں بلکہ پی ٹی آئی کو نشانہ بنانا ہے۔ ایک سخت مذمتی بیان میں پی ٹی آئی نے وزیراعلیٰ سہیل آفریدی، اسپیکر بابر سلیم سواتی اور صوبائی صدر جنید اکبر کے مبینہ اغوا اور گمشدگی پر شدید تشویش کا اظہار کرتے ہوئے ان کی سلامتی اور موجودگی کی فوری وضاحت کا مطالبہ کیا۔ بیان میں مراد سعید کے گھر پر چھاپے کی اطلاعات، پارٹی رہنماؤں اور آئی ڈی ایف کے ڈاکٹروں کی گمشدگیوں کو قانون کی حکمرانی پر سوالیہ نشان قرار دیتے ہوئے چادر و چار دیواری کا تقدس پامال کرنے اور سیاسی انتقامی کارروائیاں فوری بند کرنے کا مطالبہ کیا گیا۔