خیبرپختونخوا کے تمام ڈپٹی کمشنرز کو اختیارات تفویض کر دیئے: فیصل کریم کنڈی

خیبر پختونخوا کے گورنر فیصل کریم کنڈی نے صوبے میں امن و امان کی ناگفتہ بہ صورتحال اور سیکیورٹی خدشات کے پیش نظر تمام ضلعی ڈپٹی کمشنرز (DCs) کو خصوصی اختیارات تفویض کر دیے ہیں۔

سماجی رابطے کی ویب سائٹ ‘ایکس’ پر جاری اپنے ایک بیان میں گورنر خیبر پختونخوا نے بتایا کہ موجودہ امن و امان کے چیلنجز سے نمٹنے کے لیے انہوں نے ‘ویسٹ پاکستان مینٹیننس آف پبلک آرڈر (MPO) آرڈیننس 1960’ کی دفعہ 3(1) کے تحت کے پی کے تمام ڈپٹی کمشنرز کو باضابطہ طور پر اختیارات تفویض کیے ہیں۔ انہوں نے کہا کہ اس اقدام کا بنیادی مقصد ضلعی سطح پر بروقت اور موثر انسدادی اقدامات کو یقینی بنانا، سرکاری امور میں انتظامی تاخیر کو کم کرنا، اور قانون نافذ کرنے والے اداروں کے ساتھ باہمی رابطہ کاری کو مزید مضبوط بنانا ہے۔

گورنر فیصل کریم کنڈی نے واضح کیا کہ ان اختیارات کا استعمال آئین اور قانون کے دائرے میں رہ کر سختی سے کیا جانا چاہیے۔ انہوں نے تمام ڈپٹی کمشنرز سے توقع ظاہر کی کہ وہ پوری دیانت داری اور ذمہ داری کا مظاہرہ کرتے ہوئے لاء انفورسمنٹ ایجنسیز کے قریبی تعاون سے فرائض انجام دیں گے، اور اس بات کو یقینی بنایا جائے گا کہ ان اختیارات کا کسی بھی صورت میں غلط استعمال نہ ہو۔ انہوں نے مزید عزم ظاہر کیا کہ صوبے میں امن کا قیام، سلامتی اور عامۃ الناس کا تحفظ ان کی اولین ترجیح ہے۔