روسی وفد کا پنجاب ایمرجنسی سروسز ہیڈکوارٹرز و اکیڈمی کا دورہ، باہمی تعاون بڑھانے پر اتفاق

روس کی وزارتِ ایمرجنسی و ڈیزاسٹر کے ایک اعلیٰ سطحی وفد نے پنجاب ایمرجنسی سروسز (ریسکیو 1122) ہیڈکوارٹرز و اکیڈمی کا دورہ کیا اور سیکرٹری محکمہ ایمرجنسی سروسز ڈاکٹر رضوان نصیر سے ملاقات کی۔

ترجمان ریسکیو کے مطابق، ڈاکٹر رضوان نصیر نے روسی وفد کو پنجاب ایمرجنسی سروس کے جامع نظام، صوبائی ایمرجنسی آپریشنز سنٹر میں کال ڈسپیچ، ڈیٹا مینجمنٹ اور ایمرجنسی گاڑیوں کے جدید رسپانس سسٹم پر تفصیلی بریفنگ دی۔ ملاقات میں ہنگامی حالات سے نمٹنے، باہمی تعاون، اور پیشہ ورانہ تجربات و تربیت کے تبادلے پر تفصیلی گفتگو کی گئی۔

روسی وفد کے سربراہ اور ڈائریکٹر شعبہ بین الاقوامی تعاون ملنک دمیتری نکولائیوچ نے ریسکیو 1122 کے آپریشنل نظام اور پیشہ ورانہ تربیتی معائنے کو سراہتے ہوئے کہا کہ 2005ء کے تباہ کن زلزلے کے دوران روسی ریسکیورز کی پاکستان میں امدادی سرگرمیاں پاک روس تعلقات کی اہم مثال ہیں۔ انہوں نے کہا کہ تجربات کے تبادلے سے دونوں ممالک کے درمیان عسکری و انسانی تعاون مزید مضبوط ہوگا۔ وفد میں بولگین ایلیا، دوروتیوک انتون، اور کارپیوک دمیتری جیسے اعلیٰ روسی ڈیزاسٹر مینجمنٹ حکام بھی شامل تھے۔