امریکا کو پاکستان سے تعلقات برقرار رکھنے کی ضرورت ہے: مارکو روبیو

امریکی وزیرِ خارجہ مارکو روبیو نے جغرافیائی اور سفارتی تناظر میں پاکستان کے ساتھ امریکا کے تعلقات کو انتہائی اہم قرار دیتے ہوئے کہا ہے کہ جس طرح بھارت کے لیے ایران سے تعلقات برقرار رکھنا ضروری ہے، بالکل اسی طرح واشنگٹن کو بھی اسلام آباد کے ساتھ فعال تعلقات کی ضرورت ہے۔

بھارتی میڈیا کو انٹرویو دیتے ہوئے امریکی وزیرِ خارجہ نے واضح کیا کہ امریکا دنیا بھر میں دہشت گردی اور اس کی سرپرستی کرنے والے عناصر کے خلاف ہے۔ تاہم انہوں نے جغرافیائی حقیقتوں پر زور دیتے ہوئے کہا کہ پاکستان کے ساتھ امریکا کے گہرے تعلقات قائم ہیں اور خطے کے توازن و استحکام کے لیے ان تعلقات کو قائم رکھنا لازمی ہے۔

مارکو روبیو نے مثال دیتے ہوئے کہا کہ جس طرح بھارتی حکومت اپنے قومی مفادات کے تحت ایران اور اس کے رہنماؤں سے روابط رکھتی ہے، اسی طرح امریکا بھی پاکستان کے ساتھ شراکت داری کو برقرار رکھتا ہے۔ امریکی وزیرِ خارجہ کا مزید کہنا تھا کہ اسلام آباد کے ساتھ مسلسل گفتگو اور تعلقات قائم رکھنے سے خود امریکا کو مدد ملتی ہے اور ان ہی سفارتی راستوں کے ذریعے واشنگٹن خطے میں بھارت کو لاحق سیکورٹی خدشات دور کرنے کے لیے بھی اپنا کردار ادا کر سکتا ہے۔