مولانا فضل الرحمان غیر ذمہ دارانہ بیانات سے گریز کریں، فرح عظیم شاہ

بلوچستان اسمبلی کی رکن فرح عظیم شاہ نے جمعیت علمائے اسلام (ف) کے سربراہ مولانا فضل الرحمان کے حالیہ بیانات اور الزامات کو انتہائی افسوسناک قرار دیتے ہوئے کہا ہے کہ انہیں ملکی مفاد میں غیر ذمہ دارانہ بیانات اور بے بنیاد الزام تراشی سے گریز کرنا چاہیے۔

کوئٹہ میں ایک اہم پریس کانفرنس سے خطاب کرتے ہوئے فرح عظیم شاہ کا کہنا تھا کہ پاکستان ہمارے لیے ہر چیز پر مقدم ہے، اور امن کے قیام کے لیے ملک کا کردار عالمی سطح پر تسلیم شدہ ہے۔ انہوں نے کہا کہ جب بھی پاکستان ترقی کی راہ پر گامزن ہوتا ہے، اندرونی و بیرونی دشمن متحرک ہو کر منظم پروپیگنڈا شروع کر دیتے ہیں۔ انہوں نے زور دیا کہ موجودہ حساس حالات میں مولانا فضل الرحمان کو تدبر، تحمل اور قومی یکجہتی کو اولین ترجیح دینی چاہیے۔

رکنِ بلوچستان اسمبلی نے مزید کہا کہ یہ وقت پوری پاکستانی قوم کے اتحاد کا ہے، اور اس یکجہتی کو برقرار رکھنے میں سیاسی قیادت کو اپنا مثبت اور تعمیری کردار ادا کرنا چاہیے۔ انہوں نے بلوچستان کی سیکیورٹی صورتحال پر بات کرتے ہوئے کہا کہ وزیراعلیٰ بلوچستان کی دہشت گردی کے خلاف کوششیں تاریخی ہیں اور ان کا نام سنہرے حروف میں لکھا جائے گا۔ انہوں نے واضح کیا کہ بلوچستان اور خیبر پختونخوا کے حالات کا موازنہ نہیں کیا جا سکتا، جبکہ دہشت گردی کا یہ عارضی مسئلہ جلد ختم ہو جائے گا۔