ایران کے ساتھ امن معاہدہ طے کرنا انتہائی مشکل ہے: امریکی وزیر خارجہ

امریکی وزیرِ خارجہ مارکو روبیو نے واضح کیا ہے کہ ایران کے ساتھ کسی بھی قسم کا امن معاہدہ طے کرنا انتہائی مشکل امر ہے کیونکہ تہران کی عسکری پالیسیوں میں تاحال کوئی مثبت تبدیلی نہیں آئی ہے۔

امریکی میڈیا کو دیے گئے ایک انٹرویو میں مارکو روبیو نے خبردار کیا ہے کہ جب تک ایران آبنائے ہرمز میں بین الاقوامی تجارتی اور تیل بردار جہازوں کو نشانہ بنانا بند نہیں کرتا، اس وقت تک واشنگٹن تہران پر اپنا معاشی اور اقتصادی دباؤ پوری شدت کے ساتھ برقرار رکھے گا۔ امریکی وزیرِ خارجہ نے دعویٰ کیا کہ اس اہم عالمی آبی گزرگاہ سے تیل بردار جہازوں کی آمدورفت بحران سے پہلے کی سطح کے 80 فیصد سے تجاوز کر چکی ہے، اگرچہ ایران اس سے قبل ان دعوؤں کی بارہا تردید کر چکا ہے۔

امریکی وزیرِ خارجہ نے آبنائے ہرمز میں جہاز رانی کو نقصان پہنچانے والے ایرانی حملوں پر شدید تشویش کا اظہار کرتے ہوئے مطالبہ کیا ہے کہ ایران اس قسم کی تمام معاندانہ کارروائیاں فوری طور پر روکے۔