نئے صوبوں کے قیام پر قومی مباحثہ، سیاسی رہنماؤں کا انتظامی یونٹس بڑھانے پر زور

پاکستان میں انتظامی تنظیمِ نو اور نئے صوبوں کے قیام پر منعقدہ قومی مباحثے میں سیاسی رہنماؤں، پالیسی ماہرین اور سینئر صحافیوں نے شرکت کی، جہاں اختیارات کی نچلی سطح تک منتقلی اور وسائل کی منصفانہ تقسیم پر زور دیا گیا۔ وزیراعلیٰ بلوچستان سرفراز بگٹی نے کہا کہ بلوچستان میں نئے صوبوں کی ضرورت ہے اور صوبے میں ڈویژنوں کی تعداد 8 سے بڑھا کر 12 کر دی گئی ہے، تاہم اس فیصلے کے لیے قومی اتفاقِ رائے ضروری ہے۔ سابق وزیراعلیٰ و وزیراعظم شاہد خاقان عباسی نے مشورہ دیا کہ انگریز دور کے ڈویژنل نظام کے تحت ملک میں تقریباً 32 انتظامی یونٹس قائم کیے جائیں اور پولیسنگ کا نظام بھی مقامی سطح پر لایا جائے۔ سابق وفاقی وزیر اسد عمر نے نئے صوبوں کی آئینی و قانونی حمایت کرتے ہوئے بلدیاتی نمائندوں کی تعداد ایک لاکھ تک بڑھانے پر زور دیا، جبکہ ن لیگ کے رہنما خرم دستگیر نے نئے صوبوں کی تشکیل سے قبل بڑھتی آبادی پر قابو پانے اور ضروری ڈھانچہ تیار کرنے کو اہم شرط قرار دیا۔