نئی آٹو پالیسی پر آئی ایم ایف سے ورچوئل مذاکرات کا فیصلہ، اضافی ٹیکس کی تجویز

پاکستان نے حال ہی میں منظور کی گئی نئی آٹو پالیسی 2026–2031 پر عالمی مالیاتی فنڈ (آئی ایم ایف) کے ساتھ ورچوئل مذاکرات اور مشاورت کا فیصلہ کیا ہے۔ وزارتِ صنعت و پیداوار کے ذرائع کے مطابق پالیسی کا ابتدائی مسودہ آئی ایم ایف کو ارسال کر دیا گیا ہے تاکہ الیکٹرک گاڑیوں (EVs) پر سیلز ٹیکس کی رعایت سمیت مختلف فیڈرل ایکسائز ڈیوٹیز اور لیوی پر تفصیلی تبادلہ خیال کیا جا سکے۔ آئی ایم ایف نے ای ویز پر 18 فیصد سیلز ٹیکس عائد کرنے کا مطالبہ کیا ہے، تاہم حکومت 75 ہزار ڈالر سے زائد مالیت کی ای ویز پر 10 فیصد ایف ای ڈی اور 2 کروڑ روپے سے زائد کی گاڑیوں پر اضافی ڈیوٹیز لگا کر چھوٹی الیکٹرک گاڑیوں پر سیلز ٹیکس 1 فیصد برقرار رکھنے کا پلان پیش کرے گی۔ اس کے علاوہ 1000 سی سی سے بڑی گاڑیوں پر آٹوموٹیو ڈیولپمنٹ لیوی کے ذریعے اگلے 5 سال میں اربوں روپے کی متوقع آمدن پر بھی آئی ایم ایف کو اعتماد میں لیا جائے گا۔