لاہور ہائیکورٹ نے کمرشلائزیشن فیس پر میونسپل کارپوریشن ملتان کا حکم کالعدم قرار دے دیا

لاہور ہائیکورٹ نے کمرشلائزیشن فیس کے تنازع میں میونسپل کارپوریشن ملتان کا فیصلہ کالعدم قرار دیتے ہوئے اصول طے کر دیا ہے کہ مالی معاملات میں فریقین کے حقوق کا تعین تنازع پیدا ہونے کے وقت نافذ قانون کے مطابق ہی ہو گا۔ جسٹس جواد حسن نے شہری میاں عباس احمد کی آئینی درخواست منظور کرتے ہوئے چیف آفیسر میونسپل کارپوریشن ملتان کے 11 مئی 2026ء کے حکم کو باطل قرار دیا۔ عدالت عالیہ نے اپنے فیصلے میں واضح کیا کہ 2005ء میں دی گئی درخواست پر 2025-26ء کے قواعد کے تحت کمرشلائزیشن فیس وصول کرنا غیر قانونی ہے۔ عدالت نے مزید قرار دیا کہ سرکاری افسران وجوہات بتائے بغیر احکامات جاری نہیں کر سکتے اور بعد میں نافذ ہونے والی پالیسیاں ماضی کے معاشی و قانونی معاملات پر لاگو کر کے شہریوں پر اضافی مالی بوجھ نہیں ڈالا جا سکتا۔