ملتان: مزدور نوجوان کو گاڑی سے کچلنے کا کیس، ملزم توقیر عباس کا 4 روزہ جسمانی ریمانڈ منظور، پیشی پر وکلاء کا تشدد

ملتان کی ہاؤسنگ سوسائٹی رائل آرچرڈ میں 15 سالہ مزدور نوجوان وسیم عباس کو مبینہ طور پر گاڑی کے نیچے کچل کر قتل کرنے کے مقدمے میں پولیس نے گرفتار مرکزی ملزم توقیر عباس کو سخت سیکیورٹی میں جوڈیشل مجسٹریٹ سعدیہ اسلم کی عدالت میں پیش کر دیا۔

عدالت میں پیشی کے موقع پر شدید کشیدگی دیکھنے میں آئی، جہاں واقعے پر غصے میں بھرپور وکلاء نے ملزم توقیر عباس کو شدید تشدد کا نشانہ بنایا اور اس پر تھپڑوں کی بارش کر دی۔ پولیس کی بھاری نفری نے بمشکل ملزم کو وکلاء سے بچا کر عدالت کے سامنے پیش کیا۔

تفتیشی ٹیم کی جانب سے ملزم کے جسمانی ریمانڈ کی استدعا پر جوڈیشل مجسٹریٹ سعدیہ اسلم نے تمام دلائل سننے کے بعد ملزم توقیر عباس کا 4 روزہ جسمانی ریمانڈ منظور کرتے ہوئے اسے پولیس کے حوالے کر دیا۔ پولیس کو ہدایت کی گئی ہے کہ وہ آئندہ سماعت تک واقعے کی تفصیلی تفتیشی رپورٹ اور شواہد عدالت میں پیش کرے۔