اسحاق ڈار کی تاجک صدر سے ملاقات، علاقائی اقتصادی تعاون کے فروغ پر زور

تاجکستان کے دارالحکومت دوشنبے میں شنگھائی تعاون تنظیم (SCO) کے اجلاس کے موقع پر نائب وزیراعظم و وزیرِ خارجہ سنیر سینیٹر اسحاق ڈار اور رکن ممالک کے وفود کے سربراہان نے تاجک صدر امام علی رحمان سے مشترکہ ملاقات کی۔

دفترِ خارجہ کے ترجمان کے مطابق، تاجک صدر نے شنگھائی تعاون تنظیم کے وزرائے اعظم کے کونسل اجلاس میں شرکت کے لیے آئے تمام اعلیٰ سطحی وفود کا خیرمقدم کیا۔ ملاقات کے دوران ایس سی او کے فریم ورک کے تحت علاقائی اقتصادی تعاون کو مضبوط بنانے، باہمی تجارتی روابط بڑھانے اور خطے میں پائیدار استحکام و مشترکہ خوشحالی کے فروغ پر تفصیلی تبادلہ خیال کیا گیا۔

یہ اعلیٰ سطحی اجلاس تاجکستان کے وزیراعظم قاہر رسول زادہ کی باضابطہ دعوت پر منعقد ہو رہا ہے۔ اجلاس میں پاکستان کے نائب وزیراعظم اسحاق ڈار کے علاوہ چین، روس، بھارت اور دیگر رکن ممالک کے وزرائے اعظم اور اعلیٰ سیاسی وفود شریک ہیں، جبکہ ایران کی نمائندگی سینیئر نائب صدر ڈاکٹر محمد رضا عارف کر رہے ہیں۔ اجلاس کے دوران رکن ممالک کے مابین تجارتی شراکت داری، علاقائی سیکیورٹی چیلنجز اور اقتصادی راہداریوں کی توسیع پر اہم گفتگو جاری ہے۔