13 سال کا گند تین دن میں صاف نہیں ہو سکتا، وقت لگے گا: فیصل کریم کنڈی

گورنر خیبر پختونخوا فیصل کریم کنڈی نے صوبے بھر سے تجاوزات کے خاتمے اور صفائی ستھرائی کی بحالی کے لیے ایک باقاعدہ اور جامع پالیسی کا اعلان کر دیا ہے۔

صفائی مہم کی پالیسی کا اعلان کرتے ہوئے گورنر کے پی کا کہنا تھا کہ “صوبے کو صاف ستھرا اور سرسبز بنانا ہمارا مضبوط عزم ہے، تاہم گزشتہ 13 سال کا گند تین دن میں صاف نہیں ہو سکتا، اس پروسیس میں وقت لگے گا”۔ انہوں نے انتباہ جاری کیا کہ پشاور اور دیگر شہروں میں تجاوزات کے خلاف گرینڈ آپریشن جاری ہے، عوام غیر قانونی تجاوزات خود مسمار کر دیں ورنہ حکومت سخت ایکشن لے گی اور اس معاملے میں کسی کی سفارش قبول نہیں کی جائے گی۔

دوسری جانب، خیبر پختونخوا میں گورنر راج کے نفاذ کے بعد شہریوں کو بہتر اور صحت مند ماحول کی فراہمی کے لیے تمام متعلقہ صوبائی ادارے اور بلدیاتی عملہ متحرک ہو گئے ہیں۔ صوبائی انتظامیہ کے مطابق پشاور کی اہم شاہراہوں، تجارتی مراکز، اور عوامی مقامات سے کوڑا کرکٹ اٹھانے اور ٹھکانے لگانے کے لیے خصوصی ٹیمیں تشکیل دے دی گئی ہیں جو دن رات فرائض سرانجام دے رہی ہیں۔