ہڈیوں کی کمزوری کی تشخیص اور علاج بارے شعور اجاگر کرنا ضروری ہے: مریم نواز

وزیراعلیٰ پنجاب مریم نواز شریف نے ‘عالمی یومِ آسٹیوپوروسس’ (World Osteoporosis Day) کے موقع پر اپنے خصوصی پیغام میں کہا ہے کہ ہڈیوں کی کمزوری کی بیماری، اس سے بچاؤ، بروقت تشخیص اور علاج سے متعلق عوامی سطح پر شعور بیدار کرنا وقت کی اہم ضرورت ہے۔

وزیراعلیٰ پنجاب کا کہنا تھا کہ زندگی بھر کے لیے ہڈیوں کی حفاظت اور انہیں مضبوط بنانا سال 2026ء کا خصوصی تھیم (Theme) ہے۔ انہوں نے نشاندہی کی کہ ہڈیوں کی کمزوری ایک ‘خاموش بیماری’ کہلاتی ہے کیونکہ ہڈی ٹوٹنے سے پہلے اس کی کوئی واضح علامات ظاہر نہیں ہوتیں۔ اس مرض سے بچاؤ اور ہڈیوں کی مضبوطی کے لیے شہریوں کو کیلشیم، وٹامن ڈی اور پروٹین سے بھرپور متوازن غذا کا استعمال معمول بنانا چاہیے۔

مریم نواز شریف نے مزید بتایا کہ حکومتِ پنجاب ہیلتھ انیشی ایٹو مینجمنٹ کمپنی اور پینلڈ ہسپتالوں کے ذریعے شہریوں کو ہڈیوں اور جوڑوں کے امراض کا مفت علاج فراہم کر رہی ہے۔ اس کے علاوہ پریوینشن پروگرام کے تحت بیماریوں سے بچاؤ اور ابتدائی تشخیص کی سہولیات فراہم کی جا رہی ہیں، جبکہ خواتین، بچوں اور مزدوروں کے لیے موبائل ہیلتھ یونٹس کے ذریعے بنیادی طبی اور غذائی مشاورت بھی میسر کی جا رہی ہے۔