مولانا کو سیاسی موقف رکھنے کا حق، معدنیات پر بات قبل از وقت ہے: رانا ثنا اللہ

وزیراعظم کے مشیر اور ممتاز سیاستدان سینیٹر رانا ثنا اللہ نے کہا ہے کہ جمیعت علمائے اسلام (ف) کے سربراہ مولانا فضل الرحمان کو اپنا آزادانہ سیاسی موقف رکھنے کا پورا حق حاصل ہے، تاہم معدنیات کے معاملے پر فی الوقت کوئی بھی تنقید قبل از وقت ہے۔

نجی ٹی وی کے پروگرام میں گفتگو کرتے ہوئے رانا ثنا اللہ کا کہنا تھا کہ مولانا فضل الرحمان کے بیان کو ضرورت سے زیادہ سنجیدہ لے کر بلاوجہ فسانہ بنا دیا گیا ہے، مولانا نہ تو دکھی ہیں اور نہ ہی ان کا موقف ایسا ہے جس پر محاذ آرائی کی جائے۔ انہوں نے وضاحت کی کہ ملک میں معدنی وسائل کے حوالے سے فی الحال تو بنیادی میپنگ بھی مکمل نہیں ہوئی، اس لیے اس موضوع پر بحث یا اعتراضات بے بنیاد ہیں۔

سینیٹر رانا ثنا اللہ نے مزید کہا کہ پاکستان کے پاس جدید ترین تکنیک کے ذریعے معدنیات نکالنے کے درکار وسائل فی الوقت موجود نہیں ہیں۔ جب بھی ان وسائل کو کارآمد بنانے کے لیے کسی بین الاقوامی کمپنی کو ٹھیکہ دیا جائے گا تو اس کے بعد تنقید کا حق بنتا ہے۔ انہوں نے واضح کیا کہ معدنیات کی دریافت اور نکالنے کے پورے عمل میں وفاقی اور صوبائی دونوں حکومتوں کا اہم اور قانونی کردار ہوگا، جبکہ خیبرپختونخوا میں گورنر اور ایڈوائرری کونسل اپنا آئینی کام کر رہے ہیں