مولانا کو خیبر پختونخوا میں حصہ نہیں ملے گا: طلال چودھری

وزیرِ مملکت طلال چودھری نے جمعیت علمائے اسلام (ف) کے سربراہ مولانا فضل الرحمان کو کڑی تنقید کا نشانہ بناتے ہوئے کہا ہے کہ خیبر پختونخوا میں کسی کو بھی ‘مال غنیمت’ کے طور پر حصہ نہیں ملے گا۔

فیصل آباد میں میڈیا سے گفتگو کرتے ہوئے طلال چودھری کا کہنا تھا کہ تحریک انصاف کی صوبائی حکومت ختم ہونے کے بعد اب مولانا فضل الرحمان یہ توقع کر رہے ہیں کہ انہیں حکومت میں حصہ دیا جائے گا، لیکن خیبر پختونخوا کا موجودہ انتظامی سیٹ اپ کسی کو سیاسی حصہ دینے کے لیے نہیں بنایا گیا۔ انہوں نے کہا کہ جب کوئی شخص مذہبی شناخت اور پگڑی کا حامل ہو تو اس کی ذمہ داریاں مزید بڑھ جاتی ہیں۔

وزیرِ مملکت نے واضح کیا کہ خیبر پختونخوا میں معدنیات نکالنے کے لیے ایمرجنسی لگانے کی ضرورت نہیں تھی، بلکہ یہ عارضی سیٹ اپ اور گورنر راج صرف اور صرف صوبے سے دہشت گردی کا قلع قمع کرنے کے لیے قائم کیا گیا ہے اور جیسے ہی حالات قابو میں آئیں گے، کوشش ہوگی کہ جلد از جلد سیاسی نظام بحال کر دیا جائے۔ انہوں نے مزید کہا کہ سیاست دان ہمیں برا بھلا کہہ لیں لیکن انہیں دہشت گردوں کے حامی عناصر کے ساتھ کھڑے ہونے سے گریز کرنا چاہیے، کیونکہ ریاست اور اداروں کو ایسے عناصر سے سختی سے نمٹنا خوب آتا ہے۔